சிறுவன் கடத்தல் வழக்கு : கைதான ஏடிஜிபி ஜெயராம் பணியிடை நீக்கம்!

திருவள்ளூர் : மாவட்டம் களம்பாக்கத்தைச் சேர்ந்த தனுஷ் (23) என்ற இளைஞர், தேனி மாவட்டத்தைச் சேர்ந்த விஜயாஸ்ரீ (21) என்ற பெண்ணை இன்ஸ்டாகிராம் மூலம் காதலித்து, கடந்த மே மாதம் 15ஆம் தேதி பதிவுத் திருமணம் செய்து கொண்டார். இந்தக் காதல் திருமணத்திற்கு பெண்ணின் குடும்பத்தினர் எதிர்ப்பு தெரிவித்ததால், தனுஷின் 16 வயது சகோதரரை கடத்தியதாக புகார் எழுந்தது.

இந்தக் கடத்தல் சம்பவத்தில் புரட்சி பாரதம் கட்சித் தலைவரும், கே.வி.குப்பம் எம்.எல்.ஏ.வுமான பூவை ஜெகன் மூர்த்தி மற்றும் ஏ.டி.ஜி.பி. ஜெயராம் ஆகியோருக்கு தொடர்பு இருப்பதாக காவல்துறை குற்றம்சாட்டியது. சென்னை உயர்நீதிமன்றத்தின் உத்தரவின்படி, ஜெயராம் கைது செய்யப்பட்டு, திருத்தணி டி.எஸ்.பி. அலுவலகத்தில் விடிய விடிய விசாரணை நடைபெற்றது.

இந்த வழக்கில், ஏ.டி.ஜி.பி. ஜெயராம் ஆள் கடத்தலுக்கு அரசு வாகனத்தைப் பயன்படுத்தியதாகவும், கடத்தப்பட்ட சிறுவனை அவரது காரில் திருப்பி அனுப்பியதாகவும் விசாரணையில் தெரியவந்தது. புரட்சி பாரதம் கட்சியைச் சேர்ந்த வழக்கறிஞர் சரத்குமார் அளித்த வாக்குமூலத்தில், ஜெயராமின் கார் கடத்தல் விவகாரத்தில் பயன்படுத்தப்பட்டதாகக் குறிப்பிடப்பட்டது.

மேலும், இந்தக் கடத்தலுக்கு உதவியதாகக் கூறப்படும் ஐந்து பேர் கைது செய்யப்பட்டுள்ளனர், மற்றும் 7.5 லட்சம் ரூபாய் பறிமுதல் செய்யப்பட்டுள்ளது. சென்னை உயர்நீதிமன்றத்தில் நீதிபதி வேல்முருகன், ஜெயராமை கைது செய்து சிறையில் அடைக்க உத்தரவிட்டார், மேலும் பூவை ஜெகன்மூர்த்தியின் பங்கு குறித்து விசாரிக்கவும் அறிவுறுத்தினார்.

இந்நிலையில், காவல்துறையின் பரிந்துரையின்படி, ஏ.டி.ஜி.பி. ஜெயராமை பணியிடை நீக்கம் செய்ய தமிழ்நாடு அரசுக்கு உள்துறை செயலாளர் உத்தரவிட்டார். இந்த நடவடிக்கை, ஜெயராமின் கைது மற்றும் விசாரணைக்குப் பின்னர் எடுக்கப்பட்டது. காவல்துறை வட்டாரங்கள், ஜெயராமை நீதிமன்றத்தில் ஆஜர்படுத்துவதற்கு முன் இந்த சஸ்பெண்ட் உத்தரவு பிறப்பிக்கப்பட்டதாகத் தெரிவித்தன. இந்த விவகாரத்தில், ஜெயராம் உயர் காவல்துறை அதிகாரியாக இருந்து கொண்டு, குற்றச் செயலுக்கு உடந்தையாக இருந்ததாகக் குற்றச்சாட்டுகள் எழுந்துள்ளன. இது தமிழக காவல்துறையில் பெரும் அதிர்ச்சியை ஏற்படுத்தியுள்ளது.