வெடித்துச் சிதறும் அபாயத்தில் சிங்கப்பூர் கப்பல்? தீயணைப்பு பணி தீவிரம்!

கேரளா :கோழிக்கோடு மாவட்டம், பேய்ப்பூர் கடற்கரையில் இருந்து சுமார் 14 கடல் மைல் தொலைவில், சிங்கப்பூர் கொடியுடன் இயக்கப்படும் சரக்கு கப்பலான MV Wan Hai 503கடந்த ஜூன் 9-ஆம் தேதி அன்று காலை 10:30 மணியளவில் திடீரென தீப்பிடித்தது. இந்தக் கப்பலில் குளோரோ பார்மேட், டைமெத்தில் சல்பேட், ஹெக்ஸாமெதிலீன் டிசோசைனேட், பைரிடியம் உள்ளிட்ட ஆபத்தான ரசாயனங்கள் இருந்ததால், வெடிப்பு ஏற்படலாம் என்ற அச்சம் எழுந்தது.

இந்திய கடற்படை, கடலோர காவல்படை மற்றும் மீனவர்கள் உடனடியாக மீட்புப் பணிகளைத் தொடங்கினர். 18 பேர் பத்திரமாக மீட்கப்பட்டாலும், நான்கு பேர் காணாமல் போயுள்ளனர். கப்பலின் கீழ்தளத்தில் (underdeck) ஏற்பட்ட ஒரு வெடிப்பு தீப்பற்றுவதற்கு முதன்மைக் காரணமாகக் கருதப்படுகிறது. இந்த வெடிப்பு, கப்பலில் இருந்த ரசாயனங்களின் தன்மை அல்லது பாதுகாப்பு மீறல்களால் ஏற்பட்டிருக்கலாம்.

தீ மத்திய பகுதியிலிருந்து முன்பகுதி கொள்கலன் பகுதிக்கு (forward bay) பரவியது, ஆனால் முன்பகுதி தீ பின்னர் கட்டுப்படுத்தப்பட்டதாக இந்திய கடலோர காவல்படை தெரிவித்தது. இருப்பினும், கப்பலின் மத்திய பகுதியில் தீ மற்றும் புகை தொடர்ந்து எழுந்ததால், முழுமையான கட்டுப்பாடு இன்னும் சவாலாக உள்ளது.

கப்பலில் இருக்கும் குளோரோ பார்மேட், ஹெக்ஸாமெதிலீன் டிசோசைனேட் போன்ற ரசாயனங்கள் மிகவும் எரியக்கூடியவை மற்றும் வெப்பத்துடன் வினைபுரியும் தன்மை கொண்டவை. இவை தீயுடன் தொடர்பு கொண்டால், பெரும் வெடிப்பு ஏற்பட வாய்ப்புள்ளது. இதனால், கடல் மாசுபாடு, உயிரிழப்புகள், மற்றும் சுற்றுச்சூழல் பாதிப்பு ஏற்படலாம். இந்த அபாயத்தைக் கருத்தில் கொண்டு, மீட்புக் குழுவினர் தீயை அணைப்பதற்கு முன்னுரிமை அளித்து, கப்பலை கரைக்கு நகர்த்த முயற்சிக்கின்றனர். ஆனால், தொடர்ந்து எழும் புகையும், தீயின் தீவிரமும் இந்தப் பணியை கடினமாக்கியுள்ளது.

ஜூன் 10, 2025 வரை, கப்பலில் தீ இன்னும் முழுமையாக அணைக்கப்படவில்லை. இந்திய கடற்படையின் கப்பல்கள் மற்றும் கடலோர காவல்படையின் விமானங்கள் தீயைக் கட்டுப்படுத்துவதற்காக தொடர்ந்து பணியாற்றி வருகின்றன. 18 மீட்கப்பட்டவர்கள் பேய்ப்பூர் துறைமுகத்தில் பாதுகாப்பாக உள்ளனர், ஆனால் காணாமல் போன நான்கு பேரைத் தேடும் பணி தொடர்கிறது. உள்ளூர் மீனவர்களும் மீட்புப் பணியில் உதவி வருகின்றனர்.

இப்படியான பரபரப்பான சூழலில், தீப்பிடித்து எரியும் சிங்கப்பூர் சரக்கு கப்பல் வெடித்துச் சிதறும் அபாயத்தில் உள்ளதால் மேலும் பதற்றம் ஏற்பட்டுள்ளது. வெடிப்பு ஏற்பட்டால், கேரளக் கடற்கரைப் பகுதியில் மீன்பிடித் தொழில், சுற்றுச்சூழல், மற்றும் சுற்றுலாத் துறை கடுமையாகப் பாதிக்கப்படலாம். தற்போது, மீட்புக் குழுவினர் வெடிப்பு அபாயத்தைக் குறைக்க முயல்கின்றனர். இதற்காக, கப்பலை பாதுகாப்பான இடத்திற்கு நகர்த்துவது மற்றும் தீயை முழுமையாக அணைப்பது முக்கியமாக உள்ளது. எனவே, அதற்கான வேலைகள் மும்மரமாக நடைபெற்று வருகிறது.