மும்பை : கூட்ட நெரிசலால் ரயிலில் இருந்து தவறி விழுந்த 5 பேர் பலி!

மும்பை:இன்று காலை (ஜூன் 9, 2025) புறநகர் ரயில் ஒன்றில் ஏற்பட்ட பயங்கர விபத்தில், ஓடும் ரயிலில் இருந்து தவறி விழுந்து குறைந்தது 5 பயணிகள் உயிரிழந்தனர். மும்பையின் தானே மாவட்டத்தில் உள்ள மும்ப்ரா மற்றும் சத்ரபதி சிவாஜி மகாராஜ் முனையம் (CSMT) இடையே பயணித்த வேகமான புறநகர் ரயிலில் இந்த விபத்து நிகழ்ந்தது. கூட்ட நெரிசல் காரணமாக ரயிலின் கதவு அருகே நின்ற பயணிகள் தவறி தண்டவாளத்தில் விழுந்ததாக முதற்கட்ட தகவல்கள் தெரிவிக்கின்றன. விபத்தில் 5 பேர் உயிரிழந்தது மட்டுமின்றி 10க்கும் மேற்பட்டோர் காயமடைந்துள்ளதாகவும் தகவல்கள் வெளியாகி இருக்கிறது.

விபத்து குறித்து உடனடியாக தகவல் அறிந்த ரயில்வே அதிகாரிகளும் அவசர மீட்புக் குழுவினரும் சம்பவ இடத்திற்கு விரைந்தனர். உயிரிழந்தவர்களின் உடல்கள் மற்றும் காயமடைந்தவர்கள் அருகிலுள்ள மருத்துவமனைகளுக்கு கொண்டு செல்லப்பட்டனர். இருப்பினும், இறந்தவர்களின் அடையாளங்கள் இன்னும் உறுதிப்படுத்தப்படவில்லை. விபத்தின் சரியான காரணத்தை அறிய அதிகாரிகள் விசாரணை நடத்தி வருகின்றனர்.

கூட்ட நெரிசல், திடீர் அசைவு அல்லது கதவுகளின் தொழில்நுட்பக் கோளாறு போன்றவை காரணமாக இருக்கலாம் எனக் கருதப்படுகிறது. இந்த விபத்தால் மும்பை புறநகர் ரயில் பாதையில் சில சேவைகள் தாமதமாகின. பயணிகளின் பாதுகாப்பை உறுதி செய்ய ரயில்வே துறை தீவிர பரிசோதனைகளை மேற்கொண்டு வருகிறது. மும்பையின் புறநகர் ரயில்கள், நாளொன்றுக்கு 80 லட்சத்திற்கும் மேற்பட்ட பயணிகளை ஏற்றிச் செல்லும் முக்கிய போக்குவரத்து அமைப்பாக உள்ளன. ஆனால், கூட்ட நெரிசல் மற்றும் பாதுகாப்பு குறைபாடுகள் காரணமாக இதுபோன்ற விபத்துகள் அவ்வப்போது நிகழ்கின்றன.

இந்த சம்பவத்தைத் தொடர்ந்து, மும்பை புறநகர் ரயில்களில் தானியங்கி கதவு மூடும் வசதியை அறிமுகப்படுத்த ரயில்வே வாரியம் முடிவு செய்துள்ளது. இந்த அமைப்பு, தற்போது இயங்கும் ரயில்களில் மறுவடிவமைப்பு செய்யப்பட்டு பொருத்தப்படும் என்று மத்திய ரயில்வேயின் மக்கள் தொடர்பு அதிகாரி ஸ்வப்னில் நீலா உறுதியளித்துள்ளார்.